Tvær viðburðaríkar vikur fram undan í HR

Næstu tvær vikur verða viðburðaríkar í Háskólanum í Reykjavík þar sem geðrækt, góðgerðarmál, samstaða og sjálfbærni verða í forgrunni. Fram undan eru opnunarviðburður Guls september, Treyjudagurinn, Góðgerðarvika SFHR, Sjálfbærnidagur HR og Guli dagurinn.

Stærsta verkefni tímabilsins er Góðgerðarvika SFHR, sem fer fram dagana 7.–11. september. Alla vikuna verður safnað fyrir Píeta samtökin með þátttöku nemenda, starfsfólks, aðildarfélaga og nefnda SFHR.

Þriðjudagurinn 1. september – Opnun Guls september

Gulur september verður formlega settur í Háskólanum í Reykjavík þriðjudaginn 1. september klukkan 14:00. Áhersla átaksins í ár er sérstaklega á ungt fólk, geðrækt, forvarnir og mikilvægi þess að enginn þurfi að standa einn þegar erfiðleikar steðja að.

Á dagskrá verða ávörp frá meðal annars aðstoðarrektor HR, Ölmu Möller heilbrigðisráðherra, fulltrúa Píeta samtakanna og forseta SFHR. Þar verður fjallað um geðrækt frá sjónarhóli nemenda, mikilvægi samfélags og þau úrræði sem standa nemendum til boða innan HR.

Kór mun einnig frumflytja nýtt lag sem tengist Gulum september og starfi Píeta. Nemendur og starfsfólk HR eru hvött til að mæta og taka þátt í að hefja mánuðinn með samstöðu og jákvæðum skilaboðum.

Föstudagurinn 4. september – Treyjudagurinn

Föstudaginn 4. september verður Treyjudagurinn haldinn undir yfirskriftinni „Við erum öll í sama liði“. Dagurinn er haldinn til stuðnings krabbameinsveikum börnum og fjölskyldum þeirra.

Nemendur og starfsfólk eru hvött til að mæta í treyju liðs, félags eða landsliðs sem þeim þykir vænt um. Markmiðið er að fylla HR af litum og sýna með einföldum en sýnilegum hætti að þegar á reynir stöndum við saman sem eitt lið.

7.–11. september – Góðgerðarvika SFHR

Góðgerðarvika SFHR verður í aðalhlutverki vikuna 7.–11. september. Allur ágóði vikunnar rennur til Píeta samtakanna, sem sinna mikilvægu forvarnarstarfi gegn sjálfsvígum og sjálfsskaða og veita einstaklingum og aðstandendum þeirra stuðning og ráðgjöf.

Söfnunin verður byggð upp sem sameiginlegur sjóður. Þegar sjóðurinn nær ákveðnum áföngum verða fjölbreyttar áskoranir framkvæmdar af nemendum, stjórnendum og öðrum þátttakendum. Nemendafélög, nefndir SFHR og einstaklingar innan HR munu einnig geta lagt sitt af mörkum með eigin áskorunum og uppákomum.

Hægt verður að fylgjast með stöðu söfnunarinnar og sjá hversu langt er í næstu áskorun á heimasíðu SFHR, sfhr.is eða á miðlum félagsins. Á samfélagsmiðlum SFHR verður jafnframt birt efni frá vikunni og nánari upplýsingar um dagskrá hvers dags.

Góðgerðarvikan var endurvakin á síðasta skólaári eftir langt hlé. Þá tóku öll nemendafélögin þátt og söfnuðust rúmlega 760.000 krónur fyrir Píeta samtökin. Í ár er markmiðið að virkja enn fleiri nemendur, starfsfólk og vini HR og byggja áfram á þeim góða árangri.

Miðvikudagurinn 9. september – Sjálfbærnidagur HR

Sjálfbærnidagur Háskólans í Reykjavík fer fram miðvikudaginn 9. september og verður í ár tengdur sérstaklega við Góðgerðarviku SFHR.

Dagurinn hefst með morgunleikfimi og í hádeginu verður boðið upp á diskósúpu, þar sem athygli er vakin á matarsóun og betri nýtingu hráefna. Í Sólinni verður jafnframt fatamarkaður með aðkomu fjölbreyttra aðila. Þar gefst nemendum tækifæri til að gefa notuðum fatnaði nýtt líf og styðja um leið við gott málefni.

Einnig er stefnt að skemmtilegu uppboði í tengslum við daginn. Ágóði af fatamarkaði og uppboði mun renna til Píeta samtakanna og falla þannig beint inn í söfnun Góðgerðarvikunnar.

Fimmtudagurinn 10. september – Guli dagurinn

Fimmtudaginn 10. september verður Guli dagurinn haldinn hátíðlegur í HR. Nemendur og starfsfólk eru hvött til að klæðast gulu og taka þátt í að gera Sólinni og háskólasamfélaginu öllu gult.

Guli liturinn táknar von, samstöðu og það að gefa geðrækt og sjálfsvígsforvörnum sýnilegt rými. Boðið verður upp á gula stemningu og uppákomur í Sólinni, samhliða áframhaldandi söfnun Góðgerðarviku SFHR fyrir Píeta samtökin.

Tökum þátt saman

Viðburðir næstu tveggja vikna eiga það sameiginlegt að byggja á þátttöku, samstöðu og samfélagslegri ábyrgð. Hvort sem nemendur mæta á opnunarviðburðinn, klæðast treyju eða gulu, versla á fatamarkaði, leggja söfnuninni lið eða taka þátt í áskorun getur hvert framlag skipt máli.

SFHR hvetur alla nemendur og starfsfólk HR til að taka þátt og hjálpa til við að gera næstu tvær vikur bæði skemmtilegar og innihaldsríkar.